HÓMER - AUGNABLIK

Fréttaritari Hómers ákvað að dusta rykið af pennanum og skellti sér á leik stórliðsins á móti Augnablik á þriðjudagskvöldið í Bikarkeppni KSÍ.

Byrjunarlið Hómer: Gummi mark, Nonni Sprettur, Óli Geir, Nonni Sweeper, Elli, Valdi, Reynir, Óskar, Valli, Gústi og Mási.  Á bekknum sátu Gummi litli, Sindri, Berti (inn á fyrir Reyni á 70. mín.), Óli Hrannar (inn á fyrir Nonna Sprett á 80. mín) og Stjáni (inn á fyrir Óskar á 60. mín).

Hómeringar byrjuðu aftarlega og leyfðu vel spilandi Augnabliksmönnum að leika boltanum á milli sín en reyndu að verja síðasta þriðjung vallarins.  Þetta gekk mjög vel og voru Augnabliksmenn að skapa sér lítið þrátt fyrir fallegt spil út á vellinum.  En á 30. mínútu fékk Kristján, framherji Augnabliks, boltann inn fyrir og kláraði vel einn á móti Gumma, 0-1.  Þess má geta að áðurnefndur Kristján var kolrangstæður og slakt hjá dómaraparinu að láta það framhjá sér fara.  Nokkrum mínútum síðar skoraði miðjumaður Augnabliks með skoti frá vítateigslínu sem fór í varnarmann, að mér sýndist, og þaðan í netið, 0-2.  Hómeringar reyndu að færa sig framar og áttu nokkrar efnilegar sóknir þar sem lítið vantaði upp á að þeir næðu að skapa sér góð færi en staðan í hálfleik var 0-2.

Eftir eldmessu í hálfleik komu Hómeringar gríðarlega ákveðnir í seinni hálfleik.  Mási skoraði á 47. mínútu eftir að Gústi hafði sett hann einan í gegn, 1-2.  Frábær afgreiðsla.  Eftir þetta héldu Augnablikar áfram að halda boltanum án þess að skapa sér mikið af færum en þau færi sem þeir fengu stoppuðu öll á Gumma í markinu sem varði nokkrum sinnum mjög vel og greip oft vel inn í.  Hómeringar reyndu að færa sig framar eftir því sem leið á leikinn og í nokkrum tilvikum vantaði lítið upp á menn slyppu í gegn.  Óskar og Reynir þurftu báðir að fara útaf vegna meiðsla eftir brot og kjaftshögg frá leikmönnum Augnabliks, voru leikmenn Hómer sérstakleg ósáttir með að leikmanni Augnabliks hafi ekki verið refsað fyrir kjaftshöggið.  Á 91. mínútu skoruðu Augnabliksmenn sitt þriðja mark eftir skyndisókn, 1-3.  Hómeringar voru þá farnir framarlega og freistu þess að jafna en fengu markið í bakið.  3-1 fyrir Augnablik voru lokatölur.

Hómeringar eiga hrós skilið fyrir þennan leik þar sem andstæðingurinn er eitt albesta liðið í 3. deildinni.  Menn voru að berjast, héldu skipulaginu mjög vel og voru skynsamir.  Kannski hefði liðið átt að reyna að halda boltanum meira en það var einfaldlega mjög erfitt gegn þessu liði.  Dómarinn var svo sem ekkert að hjálpa Hómeringum heldur og flautaði öll vafaatriði með Augnablik og lét ótalinn tvö olnbogaskot.   Við því mátti svo sem búast að dómarinn myndi hallast að stærra liðinu.

Heilt yfir góður leikur sem gefur mjög góð fyrirheit fyrir sumarið.

Ég ætla að reyna að fylgjast með liðinu í sumar og skrifa inn leikjaumfjallanir hér á síðuna.

Feitur aðdáandi Hómer.

Dagskrá vikuna 20. til 26. júní

Mánudaginn, 20. júní: Æfing kl. 21:00 á Fylkisvelli

Þriðjudaginn, 21. júní: Útihlaup.  Allir taka góðan hálftíma til klukkatíma í útihlaupi. 

Fimmtudaginn, 23. júní: Leikur gegn Kumho á gervigrasinu í Laugardal.  Mæting kl. 19:30 (leikurinn byrjar kl. 20:30)

Hómer - Kærastan 5-2

Hómer tók á móti Kærustunni hans Ara á miðvikudagskvöldið í Bikarkeppni Utandeildarinnar.  Nokkrar breytingar voru gerðar á liði Hómer frá tapinu á móti Elliða.  Óskar var færður í vörnina, Valdi á kantinn og Dabbi fór í framlínuna.  Þá komu Eiður og Stjáni inn í liðið á miðjuna.

Fyrri hálfleikur:

Hómeringar komu miklu ákveðnari til leiks.  Stjáni átti gott skot rétt framhjá eftir fallegt spil hjá Sindra og Óskari.  Stuttu síðar skoraði Dabbi eftir gott spil, 1-0.  Kærastan ógnaði lítið og um miðjan hálfleikinn skoraði Dabbi aftur, fékk boltann á markteig eftir aukaspyrnu og klafs inn í vítateig, 2-0.  Stuttu seinna fékk Dabbi algjört dauðafæri eftir frábæra sendingu frá Stjána en skaut framhjá.  Einnig misnotaði Sindri fínt færi.  Kærastan náði að minnka muninn eftir aukaspyrnu og klafs í teignum, 2-1.  Dabbi átti svo skot í stöngina eftir að hafa komast einn í gegn en staðan var 2-1 í hálfleik.

Seinni hálfleikur:

Hómeringar byrjuðu betur og voru að spila gríðarlega vel.  Sindri skoraði þriðja markið eftir góðan undirbúning frá Nonna, 3-1.  Dabbi setti fjórða markið aftur eftir góðan sprett upp kantinn frá Nonna, 4-1.  Kærastan svaraði með marki þegar ca. 10 mín. voru eftir, 4-2.  Þeir áttu sinn besta kafla í leiknum eftir þetta mark og settu smá pressu á Hómeringa.  Áttu skot í stöngina og Óskar bjargaði einu sinni á marklínu.  Dabbi einfaldaði hlutina hinsvegar með frábærlega kláruðu marki, 5-2 og hans fjórða í leiknum.

Það er ekki hægt að segja annað en að allt annað var að sjá til leikmanna Hómers frá því í síðustu viku.  Breytingar á liðinu gengu vel upp og Dabbi var frábær, setti 4 mörk og var mjög hreyfanlegur í framlínunni.  Boltinn rúllaði vel fram og tilbaka í liðinu sem var mjög gaman að sjá.  Þá var gaman að sjá baráttu leikmanna Hómer en það vantaði algjörlega gegn Elliða.

Dagskrá vikuna 13. til 19. júní

Mánudaginn, 13. júní: Æfing kl. 21:00 á Fylkisvelli

Miðvikudaginn, 15. júní: Leikur gegn KHA á gervigrasinu í Laugardal.  Mæting kl. 18:00 (leikurinn byrjar 19:00)

Dagskrá vikunnar 6.6.11 til 12.6.11

Mánudaginn, 6. júní: Æfing kl. 21:00 á Fylkisvelli

Miðvikudaginn, 8. júní: Fyrsti leikur gegn Elliða á HK-velli.  Mæting kl. 19:30 (leikurinn byrjar 20:30)

Tímabilið að hefjast

Nú fer að styttast í fyrsta leik hjá okkur.  Hann er miðvikudaginn 8. júní gegn Utandeildarmeisturum Elliða.  Slök mæting hefur verið á æfingar og í æfingaleiki upp á síðkastið og þurfa menn að laga það því við höfum ekki efni á að slaka á og láta bumbuna fljúga út.

Við tökum tvær góðar æfingar í næstu viku mætum sem flestir og tökum vel á því, (ekki væri verra ef menn myndu reyna hlaupa sjálfir líka).

Æfingaleikur 19.05.2011

Æfingaleikur næstkomandi fimmtudagskvöld á Fylkisvelli við Vatnaliljur.  Mæting kl. 21:00.

Hómer - Áreitni 4-3

Síðastliðið fimmtudagskvöld spiluðu Hómeringar æfingaleik við Áreitni.

Mikið var um forföll í liði Hómer en það skipti engu máli því maður kemur í manns stað og gríðarleg breidd í Hómerliðinu.

Hómerliðið var öllu sterkara í fyrri hálfleik.  Nokkur hálffæri litu dagsins ljós en lítið um dauðafæri, Óli Geir var í framlínunni og var gamli skriðdrekinn ótrúlega seigur.  Áreitni ógnaði ákkurat ekkert í fyrri hálfleik sem var markalaus.

Í síðari hálfleik opnaðist leikurinn. Áreitni skoraði fyrsta markið, sem var reyndar rosaleg rangstaða en mark engu síður og vel gert hjá þeim, 0-1.  Hómeringar virtust vakna við þetta og strax í næstu sókn átti Sindri skot sem var frábærlega varið af markmanni Áreitni.  Stuttu síðar komst Tryggvi upp að endamörkum og gaf fyrir á Óskar sem setti boltann í fjærhornið, 1-1. Tryggvi skorar 2-1 stuttu síðar eftir frábæran einleik upp kantinn.  Óskar setti þriðja markið í slánna og inn eftir góða sendingu frá Sindra sem var sjálfur í góðu færi, 3-1.  Sindri skorar fjórða markið eftir að hann komst einn í gegn, 4-1.  Nokkur mjög góð færi voru ekki nýtt af Hómeringum sem hefðu sennilega sett miklu fleiri mörk á öðrum degi.  Á síðustu þremur mínútunum skoruðu Áreitni tvö góð mörk, þarna var skipulag Hómeringar búið að riðlast mikið en engu síður má ekkert taka af Áreitni.

Allt í allt var þetta þokkalegur leikur en skipulagið var ekki upp á það besta heilt yfir.  Það hefur mikið að segja þegar menn mæta of seint í leikinn, það er ástæða fyrir því að menn eru beðnir um að mæta 30 mínútum áður en leikurinn byrjar.  Áreitni eru með betra lið en þeir hafa verið með áður.  Í þeirra liði eru nokkrir léttir og frískir spilarar.

Æfingaleikur í kvöld við Áreitni

Æfingaleikur í kvöld, fimmtudagskvöld við Áreitni.  Leikið er á gervigrasvellinum við Kórinn og er mæting kl. 19:30.

Víðir-Hómer

Víðismenn sigruðu Hómeringa 7-0 í Bikarkeppni KSÍ sunnudaginn 1. maí. 

Hómeringar byrjuðu vel og fengu besta færi fyrri hálfleiks þegar Heimir fékk boltann á markteig en skaut yfir í dauðafæri.  Víðismenn voru mikið með boltann en sköpuðu sér engin dauðafæri en nokkur hálffæri.  Hómeringar voru vel skipulagðir og baráttuglaðir

Staðan var 0-0 í hálfleik en í byrjun seinni hálfleiks fékk Valdi, sem hafði átt mjög góðan leik, svívirðilegt olnbogaskot í andlitið frá miðjumanni Víðis, Valdi nefbrotnaði en Víðismaðurinn fékk á óskiljanlegan hátt ekki rautt spjald né gult. Á meðan stumrað var yfir Valda utan vallar og Hómeringar einum færri skoruðu Víðismenn tvö mjög vafasöm mörk, í aðdraganda fyrra marksins var Heimi augljóslega hrint af sóknarmanni Víðis og 2. mark var fáránleg vítaspyrna sem dómarinn færði Víðismönnum á silfurfati.

Eftir þetta mótlæti gáfust Hómeringar algjörlega upp og fengu á sig 5 mörk til viðbótar.

Með réttri dómgæslu hefðu verið hægt að fá eitthvað úr þessum leik en Víðismenn voru mjög vel spilandi og erfitt eiga við sérstaklega þegar leið á leikinn.